إزاى تكتب سيناريو وحوار ؟

قبل ما تكتب سيناريو لازم تعرف بنية السيناريو و إزاى تخلى الأحداث بتاعتك فى الحاضر ، ويكون عندك وصف دقيق للحاجات إللى المشاهدين هيشوفوها ويسمعوها على شاشة التلفزيون أو السينما بس، ويفضل إنك تستخدم أفعال تشويق وكلمات تصورية وجمل مختصرة وقصيرة.

لما تيجي تكتب الحوار بقى ، المفروض إنك تفضل تدرب نفسك على كتابة أشكال مختلفة ، وتستخدم لغة الحوار الواقعية .

وممكن تقرأ حوارات من كتب أو أفلام تانية عشان تقدر تجمع أفكار وتقدر تحس بالفرق بين إستخدام لغة الحوار الواقعية ولغة الحوار اللى فيه استعارات  .

ضرورى إنك تفهم طبيعة الشخصيات الداخلة فى القصة ، وازاى الشخصيات بتطور داخل القصة عشان تقدر تراعى الأبعاد النفسية لكل شخصية ، وضرورى كمان تكون عارف اسمهم وسنهم وكمان نبرة صوتهم وشكلهم ومستواهم التعليمي ، لأن كل الحاجات دى بتأثر على طريقة كلام كل شخص وصوته اذا كان صوته مليان ثقة أو خوف أو خجل ..الخ

حاول تخلى الحوار بسيط وغير معقد ومن غير مشاهد خياليه كتير .

فى السيناريو لازم تراعى التفاصيل حوالين كل شخصية وحول كل موقف وحوار بيتم داخل مشهد معين ، وكل حاجة تتعلق بيه من المكان اذا كان داخلي أو خارجى وليل ولا نهار .

وكمان تكتب إسم كل شخصية ورقم المشهد واللقطة و التوجيهات اللى فى المشهد زى إنك تسيب فترة صمت لو مفيش حوار فى المقطع دة وهكذا .

وآخر حاجة إنك تحدد زوايا التصوير وأحجام اللقطات وحركة الكاميرا ومؤثرات الصوت المستخدمة وتضيف أى ملاحظات تانية من وجهة نظرك هتفيد السيناريو أو هتسهل على المخرج التصوير .