حاجات لازم تعرفها قبل ما تبدأ تصوير فوتوغرافى (الحلقة الأولى)

لو كنت بتحب التصوير الفوتوغرافى وهاوى تمشى تصور أى حاجة بتشوفها بعينيك ، كتير مننا بيكون حابب يبروز كل اللحظات إللى بيمر بيها ، وبيكون الطريق الوحيد لتوثيق الأحداث واللحظات دى هى إنك تطلع كاميرتك وتلقط صورة .

بس هل الصورة دى بتكون مظبوطة أوى ؟ أو هل بتركز إزاى تلقطها وتظبط ألوان واضاءة الصورة وهتجيبها من أنهى زاوية ؟

هقولك شوية حاجات أساسية لازم تعرفها قبل ما تقرر تبدأ تصوير فوتوغرافى .

أول حاجة لازم تكون عارفها هي أنواع الكاميرات وإيه الكاميرة إللى هتسعدك تلقط صورة أفضل حب ميزانيتك المادية ، وتبقى على علم بتطور الكاميرات وصناعتها .

إحنا عندنا نوعين مهمين من الكاميرات (نوع جديد ، ونوع قديم)

النوع القديم إللى هو الـDSLR ودة إللى موجود فى السوق من أكتر من 50 سنة وإللى أغلبنا بنستخدمه و أكتر شركتين رواد فى كاميرات الـDSLR  هما كانون ونيكون .

النوع الجديد وهو كاميرات الـMirrorless ، ودة نوع بيتميز أنه مفيهوش مرايات من الداخل ودة بيخلى وزنها أخف وحجمها أصغر وأكبر الشركات الرائدة فى صناعتها هى سونى وباناسونيك  .

هل فى فروق جوهرية بين الإتنين ؟

كلها فروقات بسيطة زى إن الميرورليس تتفوق عن الـDSLR فى شوية حاجات منها إنها بتصور الفيديو بجودة 4K ، ولكن الـDSLR بتتميز بإنها بتمتلك أوتوفوكس أسرع من الـMirrorless  لحد دلوقتى .

و كمان الميرورليس وزنها أخف ولكن بعض الناس بتعتبر إن دة عيب مش ميزة عشان لما بتركب العدسة للكاميرة بيكون فى عدم توازن بين جسم الكاميرة وحجم العدسة .

كمان بعض كاميرات الميرورليس مبيكونش فيها Viewfinder إللى عدد كبير من المصورين بيفضلوه بسبب أنه بيمكنهم يشوفوا الصورة أوضح وواقعية أكتر.

آخر حاجة بقى البطارية و إللى بكل المقاييس الـDSLR تتفوق فيها على الميرورليس ، بطارية الميرورلين ممكن تستحمل فى الشحنة من 300-400 صورة بالكتير ، أما الDSLR ممكن تتيح لحد 800 صورة فى الشحنة الواحدة وممكن توصل لـ1000.

أما بالنسبة لجودة الصور ، فالأتنين مبيختلفوش كتير عن بعض فى حجم البيكسلات ولا حتى بيختلفوا أحياناً فى حجم المستشعر ، فبالتالى مش هتلاقى فرق فى جودة الصور بين الإتنين . ولكن كلها بترجع للتفضيلات الشخصية للمصور نفسه .