حاجات لازم تعرفها قبل ما تبدأ تصوير فوتوغرافي (حلقة3)

هنتكلم النهاردة عن أهم حاجة فى الصورة..

نسمع كتير كلمة بتتكرر من أى حد بيصور وهى الـExposure أو التعريض .

إيه هو التعريض؟ هو كمية الضوء إللى بتكون على الشئ إللى بيتصور وبيقدر المستشعر Sensor يستوعبه عشان يقدر يلقط صورة .

وعشان الضوء دة يوصل للمستشعر فهو محتاج يمر على حاجتين مهمين أول حاجة فتحة العدسة أو الـAperture  و بعدين يوصل للغالق Shutter .والوسيلة التالتة إللى بنقدر نتحكم بيها فى التعريض هى الـISO .

 و التلت حاجات دول مع بعض بنسميهم مثلث التعريض أو Triangle exposure .

أولاً : فتحة العدسة : كل ما بتزيد فتحة العدسة بتزيد كمية الضوء اللى بتدخل للمستشعر ، وكل ما قللت فتحة العدسة قلت كمية الصوء ، وفتحة العدسة بتتقاس بالرمز F ، ودة رقم كسرى لذلك كل ما الرقم دة بيزيد كمية الضوء بتقل ، وكل ما الرقم بيقل بتوسع فتحة العدسة وتزيد كمية الضوء . ودى الأرقام إللى موجودة فى العدسة f/1.4، f/2، f/2.8، f/4، f/5.6، f/8، f/11، f/16، f/22، f/32. .

ثانياً : سرعة الغالق : الغالق عامل زى الستارة اللى بتفتح وتقفل عشان تلقط الصورة ، وكل ما سرعة الشاتر زادتت قلت كمية الضوء إللى دخلت ، وعلى العكس لو قللت السرعة بيقدر يدخله كمية ضوء أكبر .

سرعة الغالق بتتقاس بالثانية ودى السرعات الموجودة بالكاميرا 1/2000، 1/1000، 1/500، 1/250، 1/60، 1/30، 1/1، 1/8، 1/4، 1/2، 1 .

ثالثاً : الـISO : بيقيس حساسية الكاميرة للضوء ، وكل ما زودنا الحساسية زادت كمية الضوء ، وكل ما قلت الحساسية قللنا كمية الضوء . ودى أرقام الحساسية إللى بتكون موجودة فى الكاميرة 100، 200، 400، 800، 1600، 3200، 6400، 12800

طب أنا إيه إللى بيحددلى الـExposure هنا ف الصورة دى كويس ولا مش مظبوط ؟

أنا عندى 3 حالات للـExposure:

1-      Under Exposure : ودة معناه إن الصورة عندى فى أماكن التعريض للضوء فيها قليل، يعني من الآخر الضورة مضلمة أو فيها أجزاء مضلمة .

2-      Over Exposure : دة معناه إن التعريض للضوء عندى عالى ، لدرجة إن فى أجزاء من الصورة تفاصيلها مش واضحة ، أو بنقول عليها بالبلدي كدة الصورة ملسوعة .

3-      Right Exposure : ودة يعني الصورة كويسة ومفيهاش أى مشاكل بالنسبة للتعريض وكل تفاصيلها واضحة .