إتكلمنا فى الحلقة إللى فاتت عن أنواع
الكاميرات وشرحنا الفرق بين كاميرات الـDSLR وكاميرات الـMIRRORLESS
،
طيب فى الحلقة دى هديلك شوية نصايح قبل ما
تصور هتخليك حتى حسيت بصعوبة فى إنك مش قادر تلقط صورة حلوة فمتحبطش وتجرب تاني
وتالت وعاشر .
أول نصيحة : حدد هدفك من التصوير ، اسأل نفسك
أنا بصور ليه ؟ وهصور إيه؟..
هبسطهالك ، عندنا ناس بتحب تصور مناسبات زى
الأفراح وأعياد الميلاد وغيرها ، وعندنا ناس دماغها رايقة بتحب تصور مناظر طبيعية
، وفى ناس بتحب تصوير الشارع ودى ناس بيفرق معاها كل لحظة بتمر قدام عينيها وبتقرر
انها توقف الزمن بالصورة إللى بتلقطها .
وفى
ناس من كتر حبها فى ناشونال جيوجرافى بتحب تصور حيوانات وحشرات ونباتات وظواهر
غريبة .
وفى ناس بتحب التصوير السياحي ودى ناس ربنا
معاهم بيلفوا جوة مصر و برة مصر ومقضيينها فسح وزيارات لأماكن سياحية ومعالم
وبيصوروا المعالم دى من أجل الترويج للسياحة مثلاً .
وأنواع تانية كتير من التصوير منها التصوير
المعمارى و التصوير الصحفى والتصوير الاعلاني والمنتجات وليلة كبيرة أوى سعادتك :D
فلازم تحدد إنت بتحب تصور إيه عشان تسهل
العملية عليك ومتحسش إن التصوير حاجة معقدة وصعبة.
النصيحة التانية : اتعرف على انواع العدسات
واستخداماتها وايه نوع العدسات اللى بتمشي مع نوع كاميرتك .
النصيحة التالتة : جرب تصور كتير ، صور أى
حاجة قدامك وأخلق منها تكوين وغير فى ترتيبها وارجع صورها تانى بشكل مختلف وزاوية
مختلفة وجرب تغير فى الاضاءة .
النصيحة الرابعة : احتفظ بكل الصور إللى
بتصورها ، عشان تقدر تتابع مدى التطور اللى بتوصله مع الوقت .
النصيحة الخامسة : اتفرج على صور كتير
لمصورين مختلفين عشان تقدر تجمع أفكار ، لكن اوعى تقلد وتعمل حاجة مطابقة ، اتفرج
بس عشان تتعلم .
النصيحة السادسة والأخيرة : تقدر تسأل صحابك
وتاخد رأى الناس إللى حواليك فى صورك ، ومتتكسفش إنك تسأل مصورين محترفين وتقبل
التعليقات والانتقاد عشان تتعلم من اخطاءك وتقدر تتجاوزها .
No comments:
Post a Comment